توپراق سورمه سی :
" ای وطن سن سن اورک مولکونده سلطانیم منیم
نازنین یاریم منیم ، نازنده جانانیم منیم
بو جهاندا یوخ سنین تک مهربان توپراق اینان
سن محبت یوردوسان ، محنت ده درمانیم منیم
تاریخه جان وئرمیسن ایسمین اولوبدور زرنگار
سنله هیبت تاپمیشام ای مهد شیرانیم منیم
کچمیسن چوخلی گوذردن مین بلانی سوومیسان
ایتمیب تدبیریله تاریخده عنوانیم منیم
توپراغیندان سورمه لر چکدیم گوزه عومروم بویو
گوزلریم آیدین اولوب گورکملی لقمانیم منیم
اولکه لر ایچره گوزلیکده تایون یوخدیر وطن
بیزلره اعطا ائدیب بیر یئرده سبحانیم منیم
چایلارین داغدان آخارکن جسمیمه جان قایتارار
عین قلبیمده آخان قیمتلی آل قانیم منیم
توپراغیندا ایله رم اوز جانیمی خلقه فدا
بو دیارین مللتی همت ده ولگانیم منیم
سن سن آذربایجان اودلار دیاری فخریمیز
باغلانیب سنله وطن گویلرده پیمانیم منیم
سن (کیان) تبریز بالاسی یاخچی یازدین شعرووی
ارخیین سویله وطن سرفصل دیوانیم منیم
( کیان )
برچسب: ،
